ഉള്ളിൽ അയ്യർ, പുറത്ത് മോഷണം

ഉള്ളിൽ അയ്യർ, പുറത്ത് മോഷണം

മമ്മൂട്ടിയുടെ സി ബി ഐ പരമ്പരയുടെ അഞ്ചാം ഭാഗം തിയേറ്ററുകളിൽ നിറഞ്ഞ കൈയ്യടിയോടെ മുന്നേറുകയാണ്. ഇപ്പോളിതാ സി ബി ഐ 5 പ്രദർശനം നടന്നുകൊണ്ടിരിക്കുന്ന തിയേറ്ററിൽ മോഷണം നടന്നു. കോഴിക്കോട് മാവൂർ റോഡിലെ കൈരളി- ശ്രീ തിയേറ്റർ കോംപ്ലക്സിൽ നിന്ന് 2.8 ലക്ഷം രൂപയാണ് മോഷണം പോയത്. ഈ വാർത്ത പുറത്തുവന്നതോടെ തിയേറ്ററിൽ സിബിഐ ഓടിക്കൊണ്ടിരിക്കുമ്പോൾ പുറത്ത് മോഷണം എന്ന തരത്തിൽ ട്രോളുകൾ നിറഞ്ഞു നിൽക്കുന്നു. കോംപ്ലക്സിലെ ഭക്ഷണ കൗണ്ടറുകളിൽ നിന്നാണ് കഴിഞ്ഞ ദിവസം പുലർച്ചെ മൂന്നരയ്ക്കു ശേഷം മോഷണം നടന്നത്. ശനി, ഞായർ ദിവസങ്ങളിൽ രാത്രി 12ന് പ്രത്യേക മിഡ്നൈറ്റ് ഷോ നടക്കാറുണ്ട്. ആ പ്രദർശനം അവസാനിച്ചത് പുലർച്ചെ രണ്ടേമുക്കാലിനാണ്. ഇതിനു ശേഷം ജീവനക്കാർ ഉറങ്ങാൻ പോയ സമയത്താണ് മോഷണം നടന്നത്. കൈരളി തിയേറ്ററിന്റെ ഫസ്റ്റ് ക്ലാസ് പ്രവേശന കവാടത്തോടു ചേർന്നുള്ള ഭക്ഷണ കൗണ്ടറിൽ നിന്നാണ് ഏറ്റവുമധികം തുക മോഷണം പോയത്. കൈരളി തിയേറ്ററിന്റെ ബാൽക്കണി, ശ്രീ തിയേറ്ററിന്റെ പ്രവേശന കവാടം എന്നിവയുടെ സമീപത്തുള്ള രണ്ടാമത്തെ കൗണ്ടറിൽ നിന്ന് അയ്യായിരത്തോളം രൂപയും നഷ്ടപ്പെട്ടു. രണ്ട് ദിവസത്തെ വരുമാനവും ബാങ്ക് ഡ്രാഫ്റ്റ് എടുക്കാൻ സൂക്ഷിച്ച പണവുമാണ് മോഷ്ടിക്കപ്പെട്ടത്. തമിഴ്നാട് സ്വദേശിയായ മുരുകനാണ് ഭക്ഷണ കൗണ്ടറുകളുടെ നടത്തിപ്പ് കരാറുകാരൻ.മോഷണത്തിന് ആകെ നാലു മിനിറ്റ് സമയമാണ് എടുത്തതെന്ന് സിസിടിവി ദൃശ്യങ്ങളിൽ നിന്നു പൊലീസ് കണ്ടെത്തിയിട്ടുണ്ട്. തലയിൽ തോർത്തിട്ടു മൂടി മാസ്ക് അണിഞ്ഞ് 3.44ന് തിയേറ്ററിൽ എത്തിയ മോഷ്ടാവ് പണമെടുത്ത് 3.47ന് പുറത്തിറങ്ങി. ക്യാമറയിലെ ദൃശ്യങ്ങളിൽ മോഷണം വ്യക്തമാണെങ്കിലും മോഷ്ടാവിനെ തിരിച്ചറിയാൻ കഴിഞ്ഞിട്ടില്ല.

ഇനി മുതൽ പുതിയ വാർത്തകൾ, എല്ലാ നേരവും. ഇപ്പോൾ തന്നെ ഡൗൺലോഡ് ചെയ്യൂ Download Now : http://bit.ly/Newscom

Comments: 0

Your email address will not be published. Required fields are marked with *