Flash News

ഹൈടെക്കായി പോസ്റ്റോഫീസും; എല്ലാ സേവനങ്ങളും ഒറ്റ ഫോൺകോളിൽ

പോസ്റ്റോഫീസ് ഇടപാടുകൾ എളുപ്പത്തിൽ നടത്താൻ പ്രത്യേക സംവിധാനവുമായി തപാൽ വകുപ്പ്. ഒറ്റ ടോൾഫ്രീ നമ്പറിൽ എല്ലാ സേവനങ്ങളും ലഭ്യമാകും. പോസ്റ്റോഫീസ് സേവിങ്സ് അക്കൗണ്ട് ഉടമകൾക്ക് എല്ലാ ലഘു സമ്പാദ്യ പദ്ധതികളും സംബന്ധിച്ച സേവനങ്ങൾ ഒറ്റ ഫോൺ കോളിലൂടെ ലഭിക്കും. സേവിങ്സ് അക്കൗണ്ടുകളിലെ ഇടപാട് സംബന്ധിച്ച വിവരങ്ങൾ, ലഘു സമ്പാദ്യ പദ്ധതികളുടെ പലിശ നിരക്ക്, പുതിയ എടിഎം കാര്‍ഡ് തുടങ്ങി എല്ലാ വിവരങ്ങളും ഇനി ഒറ്റ ഫോൺ കോളിലൂടെയറിയാം.

ടോൾ ഫ്രീ നമ്പർ:
എല്ലാ സേവനങ്ങളും ഒരു കുടക്കീഴിൽ ലഭ്യമാകുന്നതിന് 18002666868 എന്ന പുതിയ ടോൾഫ്രീ നമ്പര്‍ ആണ് പോസ്റ്റോഫീസ് അവതരിപ്പിച്ചത്. ഇൻ്ററാക്ടീവ് വോയ്സ് റെസ്പോൺസ് ആണ് ഇതിൽ ഉപയോഗിച്ചിരിക്കുന്നത്. രജിസ്റ്റര്‍ ചെയ്ത മൊബൈൽ നമ്പര്‍ ഉപയോഗിച്ച് 18002666868 എന്ന ടോൾ ഫ്രീ നമ്പറിലേക്ക് ഉപഭോക്താക്കൾക്ക് വിളിക്കാം.

ടേം നിക്ഷേപങ്ങൾ, റെക്കറിങ് നിക്ഷേപങ്ങൾ, മന്ത്‍ലി ഇൻകം സ്കീം, നാഷണൽ സേവിങ്സ് സര്‍ട്ടിഫിക്കറ്റ് നിക്ഷേപം തുടങ്ങി വിവിധ നിക്ഷേപ പദ്ധതികളെ കുറിച്ചറിയാനും പലിശ ക്രെഡിറ്റായത് സംബന്ധിച്ച വിവരങ്ങൾ അറിയാനും ഒക്കെ ടോൾ ഫ്രീ നമ്പര്‍ പ്രയോജനപ്പെടുത്താം.

ബാലൻസ് അറിയാൻ:
ടോൾ ഫ്രീ നമ്പറിൽ വിളിച്ച് ഭാഷ തിരഞ്ഞെടുത്ത ശേഷം വരുന്ന ഓപ്ഷനിൽ ബാലൻസ് അറിയാൻ അഞ്ച് എന്ന് ഡയൽ ചെയ്യണം. ശേഷം പോസ്റ്റോഫീസ് അക്കൗണ്ട് നമ്പര്‍ നൽകി # നൽകാം. എടിഎം കാർഡ് ബ്ലോക്ക് ചെയ്യുന്നതിന് 6 ഡയൽ ചെയ്യാം. 1 ഡയൽ ചെയ്ത് കാർഡ് നമ്പർ നൽകാം. 2 ഡയൽ ചെയ്ത് അക്കൗണ്ട് നമ്പർ നൽകാം. 3 ഡയൽ ചെയ്ത ശേഷം കസ്റ്റമർ ഐഡി നൽകാം. മറ്റ് സേസേവനങ്ങൾക്കായി 7 ആണ് ഡയൽ ചെയ്യേണ്ടത്. എടിഎം കാര്‍ഡുമായി ബന്ധപ്പെട്ട കൂടുതൽ സേവനങ്ങൾക്ക് 3 ഡയൽ ചെയ്യാം. എടിഎം കാർഡ് പിൻ നമ്പര്‍ മാറ്റുന്നതിന് 1 ഡയൽ ചെയ്യാം. പുതിയ കാർഡിനായി രണ്ട് നൽകാം.

മറ്റ് സേവനങ്ങൾ:
സേവിങ്സ് അക്കൗണ്ട് വിവരങ്ങളും ഈ സംവിധാനത്തിലൂടെ അറിയാം. അക്കൗണ്ടിൽ നിന്ന് നൽകിയ ചെക്കിൻെറ സ്റ്റാറ്റസ് അറിയാൻ ടോൾഫ്രീ നമ്പറിൽ വിളിച്ചതിന് ശേഷം അക്കൗണ്ട് നമ്പര്‍ നൽകി 1 ഡയൽ ചെയ്യാം. നിങ്ങളുടെ അക്കൗണ്ടിലെ അവസാന നാല് ഇടപാടുകളുടെ വിശദാംശങ്ങൾ അറിയാൻ 2 ഡയൽ ചെയ്താൽ മതി. അക്കൗണ്ടിലെ തുകയും നികുതി കുറച്ചതും ഒക്കെ അറിയാൻ 4 ഡയൽ ചെയ്യാം. ഒരു പുതിയ അക്കൗണ്ടിന് ഒന്ന് തന്നെ നൽകാം. ഡെബിറ്റ് അല്ലെങ്കിൽ എടിഎം കാർഡ് വിശദാംശങ്ങൾക്ക് 2 ഡയൽ ചെയ്യാം, പലിശ നിരക്കിനും സർവീസ് ചാർജ് സംബന്ധിച്ച വിവരങ്ങൾ അറിയുന്നതിനും 3 നൽകാം.

നിക്ഷേപങ്ങളെക്കുറിച്ചറിയാൻ:
ടേം ഡെപ്പോസിറ്റ് അക്കൗണ്ടിലെ ഇടപാടുകളെക്കുറിച്ചുള്ള അന്വേഷണങ്ങൾക്ക് 2 എന്ന് ഡയൽ ചെയ്ത ശേഷം അക്കൗണ്ട് നമ്പർ നൽകുക തുടർന്ന് #നൽകുക. നാഷണൽ സേവിങ്സ് സര്‍ട്ടിഫിക്കറ്റ്, കിസാൻ വികാസ് പത്ര ഉൾപ്പെടെയുള്ള പദ്ധതികളേക്കുറിച്ച് ഇതിലൂടെ അറിയാനാകും.

തിങ്കൾ മുതൽ ശനി വരെയുള്ള എല്ലാ ദിവസങ്ങളിലും രാവിലെ ഒൻപത് മുതൽ വൈകിട്ട് ആറ് മണി വരെ സേവനങ്ങൾ ലഭിക്കും. ഞായറാഴ്ചകളിലും പൊതു അവധി ദിനങ്ങളിലും സേവനങ്ങൾ ലഭ്യമാകില്ല.

Comments: 0

Your email address will not be published. Required fields are marked with *