Flash News

നല്ല സൂപ്പർ സോഫ്റ്റ് ഇഡ്ലി ഉണ്ടാക്കാം..ചില സൂത്രപണികൾ ഇതാ..

സൗത്ത് ഇന്ത്യന്‍ പ്രാതല്‍ വിഭവങ്ങളില്‍ പ്രധാനപ്പെട്ടതാണ് ഇഡ്ഢലി. തമിഴ്‌നാട്ടില്‍ നിന്നും ഉടലെടുത്ത വിഭവമാണിത്. ഇത് ഏറെ ആരോഗ്യകരവുമാണ്. ആവിയില്‍ വേവിച്ചെടുക്കുന്ന ഈ സൗത്ത് ഇന്ത്യന്‍ ഭക്ഷണം ആരോഗ്യകരമായ ഇന്ത്യന്‍ ഭക്ഷണങ്ങളുടെ കൂട്ടത്തില്‍ ഏറെ പ്രസിദ്ധി നേടിയ ഒന്നുമാണ്. എന്നാല്‍ പലപ്പോഴും ഇഡ്ഢലി നല്ല മയത്തില്‍ വരാത്തതാണ് പലരേയും അലട്ടുന്ന പ്രശ്‌നം. ഒട്ടിപ്പിടിച്ച് പലപ്പോഴും പണി തരാറുമുണ്ട്. ഇതാ നല്ല സൂപ്പർ സോഫ്റ്റായി ഇഡ്ലി ഉണ്ടാക്കാൻ ചില നുറുങ്ങുകൾ.

ഇഡ്ഢലിയുടെ മാര്‍ദവം ഇഡ്ഢലി തയ്യാറാക്കുന്ന മാവിലാണ് പ്രധാനമായും അടങ്ങിയിരിയ്ക്കുന്നത്. ഇതിനായി കൃത്യമായ രീതിയില്‍ മാവ് അരച്ചെടുക്കുക എന്നത് പ്രധാനം. ഇതിനായി മാവ് അരയ്ക്കുന്നതിന് എടുക്കുന്ന അരിയും ഉഴുന്നും നല്ല ഗുണമുള്ളതായിരിയ്ക്കണം. ഇഡ്ഢലി റൈസ് എന്ന പേരില്‍ അരി ലഭ്യമാണ്. ഇതല്ലെങ്കില്‍ ഗുണനിലവാരമുളള പച്ചരി ഉപയോഗിയ്ക്കാം. 4 1 ആനുപാതത്തിലാണ് ഇതിനായി അരിയും ഉഴുന്നും എടുക്കേണ്ടത്. അതായത് നാലു ഗ്ലാസ് അരിക്ക് 1 ഗ്ലാസ് ഉഴുന്ന് എന്ന അളവില്‍.

ഉഴുന്നും അരിയും എഴെട്ട് മണിക്കൂര്‍ വെവ്വേറെ കുതിര്‍ത്തണം. ഉഴുന്ന് കുതിര്‍ത്ത വെള്ളത്തില്‍ തന്നെ അരയ്ക്കുന്നത് ഏറെ നല്ലതാണ്. ഇതു പോലെ ഇത് നല്ലതു പോലെ അരയ്ക്കണം. ആദ്യം അരയ്‌ക്കേണ്ടത് ഉഴുന്നാണ്. തീരെ വെള്ളം കുറവോ വെള്ളം കൂടുതലോ ആകരുത്. ഉഴുന്ന് നല്ലതു പോലെ അരച്ച ശേഷം വാങ്ങി പാത്രത്തിലാക്കിയ ശേഷം മാത്രം അരി അരയ്ക്കുക. അരിയ്‌ക്കൊപ്പം അല്‍പം അവല്‍ കൂടി കുതിര്‍ത്തി അരയ്ക്കാം. ഇത് കൂടുതല്‍ സോഫ്റ്റ് ആകാന്‍ നല്ലതാണ്. ചിലര്‍ ചോറു ചേര്‍ത്തും അരയ്ക്കും. അവല്‍ നല്ല വെളുപ്പു നിറവും നല്‍കും. അരി റവയുടെ തരുതരുപ്പില്‍ വേണം, അരയ്ക്കാന്‍. പിന്നീട് ഉഴുന്നും അരിയും ചേര്‍ത്ത് നല്ലതു പോലെ ഇളക്കുക. കയ്യു കൊണ്ട് ഇത് ഇളക്കുന്നത് നല്ല ഫെര്‍മെന്റിംഗ് ഗുണം നല്‍കും. നല്ലതുപോലെ ഇളക്കിയ ശേഷം ഏഴെട്ടു മണിക്കൂര്‍ പൊന്താന്‍ വയ്ക്കണം. ഇത് അന്തരീക്ഷ താപനില അനുസരിച്ച് പൊന്താന്‍ സമയമെടുക്കും. തണുപ്പുള്ള സ്ഥലങ്ങളില്‍ കൂടുതല്‍ സമയമെടുക്കും.

വെള്ളം നല്ലതു പോലെ തിളച്ച ശേഷം മാത്രം ഇഡ്ഢലിത്തട്ടില്‍ ഇഡ്ഢലി വേവിയ്ക്കാന്‍ വയ്ക്കുക. ഇഡ്ഢലിത്തട്ടില്‍ അല്‍പം നല്ലെണ്ണ പുരട്ടി വയ്ക്കുന്നത് നല്ലതാണ്. ഇത് സ്വാദു നല്‍കും. പണ്ടു കാലത്ത് ഇഡ്ഢലിത്തുണി ഉപയോഗിച്ചിരുന്നു. ഇതും നല്ലതാണ്. പാകത്തിന് മാവില്‍ ഉപ്പ് ചേര്‍ക്കാം. പിന്നീട് വെന്തു കിട്ടാന്‍ വയ്ക്കാം. വെന്ത് ചൂടാറിയാല്‍ ഇഡ്ലി തട്ടില്‍ നിന്നും വേര്‍പെടുത്താം. തട്ടിന് അടിയില്‍ തണുത്ത വെള്ളം ഒഴിച്ചാല്‍ പെട്ടെന്ന് തന്നെ ഇഡ്ലി വിട്ടു പോരും. ഇതു പോലെ ഇഡ്ലിയ്ക്കു മുകളില്‍ വെള്ളം തളിച്ച് എടുക്കുന്നതും നല്ലതാണ്.

Comments: 0

Your email address will not be published. Required fields are marked with *